ఏదేని మనిషి అంతరంగంలో దాగి ఉన్న మంచి – చెడు లక్షణాలను సహజంగా కొందరు గమనించ గలుగుతారు. కానీ వారిలో ఉన్న తప్పులను వేలెత్తి చూపి అనుకోకుండా ఒకరికి ఒకరు మధ్యలో అభిప్రాయ బేధాలను సృష్టించుకుని మరి ఏది మంచి మార్గం! మరి ఇంకేది చెడు మార్గం!! అనే విషయాలను పూర్తిగా గ్రహించక ముందే కొందరి మధ్య అంతరాలు ఏర్పడతాయి. అలాంటి వాస్తవిక కోణాలను కొన్ని సంఘటనలను దగ్గర నుంచి చూసి వాటికి పరిష్కారం తమకు తామే తెలుసుకొనే మార్గదర్శిగా నిలుస్తున్న కథల పుస్తకం ” మిగిలేవి … గురుతులే “.
తల్లిదండ్రులు గౌరీభట్ల వెంకటేశ్వరశర్మ , అన్నపూర్ణల సంతానంగా ధూళిపాళ అరుణ జన్మించారు. భువనగిరి జిల్లా వాస్తవ్యురాలైన తను ఎంఏ తెలుగు, ఇంగ్లీషు, తెలుగు పండిట్, టి .పి.టి విద్యనభ్యసించి ఉపాధ్యాయురాలిగా, ఉపన్యాసకురాలిగా,వైస్ ప్రిన్సిపాల్ గా 25 సంవత్సరాల బోధనానుభవం కలిగి ప్రస్తుతం సాహిత్య సేవలో కొనసాగుతున్నారు. కవిత్వం,కథా, విమర్షా సాహిత్యంలో తనదైన ప్రత్యేకతను చాటుకుంటూ మాటలతో కాకుండా చేతల {రచనల)తో నిరూపించుకుంటున్న రచయిత్రి, ధూళిపాళ అరుణ. ఇంటర్ చదువుతున్నప్పుడే సాహిత్యం పై తన అభిమానాన్ని పెంచుకొని రచనలు చేయగలిగారు.
తన పుట్టుక ఒకచోట – తన మరణం మరోచోట గా స్త్రీ యొక్క మనుగడ మన భారతదేశంలో బంధాలు అనుబంధాలను ఉద్దేశించి కొనసాగుతున్న క్రమంలో మన సమాజం స్త్రీకి పెద్దపీట వేసింది. కానీ ఒక మనిషి యొక్క అంతరంగంలో ఉన్న పూర్తి తత్వాన్ని తెలుసుకోకముందే పెళ్లి అనే మూడు ముళ్ల బంధంతో ఏకమై స్త్రీ తన చివరి గమనం వరకు నడుస్తున్న క్రమంలో తల్లిగా, సోదరిగా, భార్యగా ఇలా పలు బాధ్యతలను నిర్వహిస్తూ కష్టాలను, నష్టాలను ఎదుర్కొని తన జీవితాన్ని పుట్టినింటి నుండి మొదలుకొని మెట్టినింటి వరకు ప్రస్థానాన్ని కొనసాగిస్తున్నది. కుటుంబం పరువు, గౌరవం, తన సంతానానికి రేపటికిభవిష్యత్తు, స్త్రీ అందిస్తున్నటువంటి వైవిధ్యమైన పాత్రలలో ఎదుర్కొంటున్న ప్రధాన సమస్యలను ఇతివృత్తంగా తీసుకొని రచయిత్రి ధూళిపాళ అరుణ ఈ కథా సంపుటి నందు సమాజంలో కొన్ని సంఘటనలు తన కళ్ళ ముందు చూసినవి, స్నేహబంధాలలో తను స్వయంగా ఎదుర్కొన్నవి సూటిగా చెప్పగలిగారు. తన కదా సంపుటి “మిగిలేవి … గురుతులే” అందలి రచనలను ఒకసారి పరిశీలిస్తే….
మిగిలేవి… గురుతులే కథలో వెంకటేశ్వర్లు జ్ఞాపకం గా మిగిలిపోయిన ఇల్లును పిల్లలు పడగొట్టాలని, అమ్మకానికి సిద్ధమవుతున్న సందర్భంగా వెంకటేశ్వర్లు మనసులో ఉన్న తన భార్య స్మృతులను , మనసు ఆవేదనను తెలుసుకొని కథాంశంగా రచయిత్రి కథలో చెబుతూ…ఆగకుండా వస్తున్న కన్నీళ్ళు ఆయన గుండెల మీదకి జారుతున్నాయి. ద్రవించిపోయాను. నిస్సహాయంగా అలాగే చూస్తూ ఉండిపోయాను. అలా ఎంతసేపు గడిచిందో తెలియదు. అంతటా నిశ్శబ్దం. చాలా సేపటికి కూర్చున్న ఆయన వీపు నాకు చల్లగా తగిలింది. ఆయన తన జ్ఞాపకాలను ఎక్కడికో తీసుకుపోలేక ఇక్కడే
వదిలేశారని గ్రహించాను. ఆ దంపతులతో పాటు వారితో నా జ్ఞాపకాలు కూడా రేపటి రోజున ఇక్కడే సమాధి అవుతాయని అర్థమై భారంగా కళ్ళు మూసుకున్నాను. అంటూ ఒక కన్నీటి పర్వంతమైన భావోద్వేగ సన్నివేశాన్ని ఈ కథలో రచయిత్రి అరుణ చెప్పారు.
జెర జెప్పండి సారూ…. కథలో… వివాహేతర సంబంధాల కారణంగా చిదిలమవుతున్నటువంటి దాంపత్య జీవితాలు నేటి కాలంలో మనం చూస్తూనే ఉన్నాం. దైవసాక్షిగా వేదమంత్రాల మధ్యన, మూడుముళ్ల బంధంతో వివాహ అనుబంధం ద్వారా భార్యాభర్తల యొక్క దాంపత్య జీవితం నిండు నూరేళ్లు సుఖశాంతులతో ఉండాలని దేవతలు దేవుళ్ళ దీవెనలతో పాటుగా, బంధుమిత్రుల ఆశీస్సులు అందుకుని కొనసాగుతున్న జీవితంలో వివాహేతర సంబంధాలు మన సంస్కృతి సాంప్రదాయాలకు విరుద్ధంగా కొందరు చేస్తున్న అసాంఘిక పనుల ద్వారా నిండు జీవితాలు బలి కావడం, మనస్పర్దలతో కూడుకున్న అసంతృప్తి జీవితాల పరిణామక్రమం ఇతివృత్తంగా ఈ కథలో రాజయ్య మనసు బాధ ఎవరు తీర్చలేనిది.
మరో కథలో అంగవైకల్యం శరీరానికే కానీ మనిషి మనసుకు కాదు అని తీర్పు చెప్పుతూ త్రివేణికి సరియైన జోడు దొరికింది. నీ స్నేహమే కథలో…. తొందరపడి మనుషుల మధ్య బావ వైరుధ్యం కారణంగా స్నేహాలు దూరమవుతున్న విషయాలను తెలియజేస్తూ అరణ్య వినోదల మధ్య ఉన్న స్నేహ బంధాన్ని తెలిపారు.
నీకు నేనుగా కథలో… భార్గవ్ చేసిన గొప్ప పని మానవతా కోణాన్ని మరోసారి గుర్తు చేసింది. కవితా వాహిని కథలో… చప్పట్లు హోరులో కృతజ్ఞతా పూర్వకంగా కవిత అందరికీ నమస్కరిస్తూ వెళుతున్న సందర్భంలో కొడుకు కోడలు ఇద్దరు కళ్ళ ముందు కనిపించి వారి సంతోషాన్ని చూసి మురిసిపోయిన కవిత మాటలు చెప్ప రానివి.
తీర్పు కథలో… రాక్షసంగా ప్రవర్తించిన తండ్రి వీరేష్ చేసిన నీచపు పనికి అభం శుభం తెలవని చిన్నారి జీవితాన్ని కాపాడటానికి ఆ భగవంతుడు ప్రయత్నం చేయకపోయినా… వీరేష్ కు సరైన శిక్ష పడింది. ధైర్యంతో ముందుకు సాగాలి అనే కథాంశం తో ముందుకు వచ్చిన కథ “తీర్పు “.
మార్పు దిశగా కథలో… మోహన్ సాధారణంగా కొన్ని వినాయక చవితి కార్యక్రమాలలో కొన్ని మండపాల వద్ద జరుగుతున్నటువంటి సంఘటనలను దృష్టిలో పెట్టుకొని ఒక లేని ఆశను తనలో కల్పించుకుని ఏదో చేయాలనుకున్న తన స్వార్థపు ఆలోచనకు నిజంగా భగవంతుడే తన హృదయంలోకి వచ్చి ఒక మార్పును తీసుకువచ్చినట్లుగా కథ నడిపించిన తీరు చాలా బాగుంది. మోహన్ ఉద్యోగ వేటలో పడి మంచి ఉద్యోగం సాధిస్తాడని ఆశాజనకంగా చదివించినది. మానవత కథలో… ఇంటి యజమాని శ్రీ వాణి మానవత్వంతో కూడిన సందేశాన్నిస్తూ కథ సాగిన తీరు చివరివరకు పాఠకున్ని చదివించింది.
ఒక కథలో స్త్రీకి జరిగిన అన్యాయాన్ని తెలియజేశారు. మరో కథలో పురుషుడికి జరిగిన అన్యాయాన్ని తెలియజేశారు. సమాజంలో అన్ని సంఘటనలు ఉంటాయి. అనే వాస్తవిక కోణంగా కథల్లో ఉన్న విషయాలు చదువుతుంటే కళ్ళకు కట్టినట్లుగా కనిపిస్తున్నాయి.
ఏదో ఊహ లోకంలో వ్యవహరించకుండా తన చుట్టూ ఉన్న సమాజంలోని కుటుంబాల వాస్తవిక జీవన చిత్రాలను, అక్కడక్కడ జరుగుతున్న కొన్ని సంఘటనలను, తన హృదయాన్ని కదిలించిన మరెన్నో సమాధానాలు లేని ప్రశ్నలకు అక్షర రూపంగా “మిగిలేవి…గురుతులే” కథల సంపుటిలో కవితా వాహిని,తీర్పు, మార్పు దిశగా,మానవత, నీ స్నేహమే నీకు నేనుగా, చైత్రరాగం, జెర జెప్పండి సారూ…!, ఇక నిశ్చింతగా, మిగిలేవి… గురుతులే, ఐక్యతాసూత్రం, అలాంటి తల్లులుండబట్టే, తప్పెవరిది, ఇదేనా న్యాయం!, తోడు. ఇలా 15 కథలతో ప్రత్యేకమైన కథాంశాలతో కథ చెప్పే ఓర్పు,నేర్పు,సహనంతో పాటుగా పాత్రలను సమాజ కోణంలో సందర్భానుసారంగా కొనసాగించడం చేయి తిరిగిన రచయిత్రిగా అరుణ చెప్పగలిగారు. తన రచనలు మిగిలేవి…గురుతులే (కథా సంపుటి) జ్ఞాపకాల సంతకం (కవితా సంపుటి) ఆచార్య అనుమాండ్ల భూమయ్య సాహిత్యావలోకనం (పరిచయ గ్రంథం) మరియు తన గురువర్యులైన గోపాల్ రెడ్డి బ్రెయిల్ లిపిలో రాసుకున్న జీవిత చరిత్రను తెలుగులోకి లిప్యంతరీకరణ చేయడం జరిగింది.(ఇట్టి నవల యూట్యూబ్ ద్వారా తన గళంలో అప్లోడ్ చేయడమైనది)లు ముద్రించబడినవి. మరియు ప్రస్తుతం హరిహర త్రిశక్తి శతకం ముద్రణలో యున్నది. ప్రముఖుల సాహిత్య రచనలపై విశ్లేషణా వ్యాసాలు, ముఖాముఖీలు చేసి తన ప్రత్యేకతను చాటుకుంటున్న సోదరి ధూళిపాళ అరుణ గారికి శుభాకాంక్షలు
పరిచయం
-డా. చిటికెన కిరణ్ కుమార్
రచయిత, విమర్శకుల
సభ్యులు: ఇంటర్నేషనల్ బెనెవోలెంట్ రీసెర్చ్ ఫౌండేషన్,
ఎగ్జిక్యూటివ్ వైస్ ప్రెసిడెంట్ : మానేరు రచయితల సంఘం,
ఓ తండ్రి తీర్పు లఘు చిత్ర కథకులు
చైతన్య స్ఫూర్తి -చిటికెన వ్యాసాలు
సెల్ : 9490841284
రాజన్న సిరిసిల్ల.
