స్వతంత్రత – నీవు
ఈ జీవన పోరాటంలో అనునిత్యం అనుక్షణం కొత్తదనాన్నే ఆస్వాదిస్తారెవరైనా! కాని ఒప్పుకోరు. బ్రతుకు బడి చాలా పెద్దది. కూర్చుని చదువుకోని పాఠాలన్నో ఉంటాయి. పాఠాలు నేర్పని గురువులా కాలం వెంటనే ఉంటుంది.
చాలా విషయాల్లో తేలికగా తీసుకునే మనిషి తన అస్తిత్వానికి దెబ్బ అనుకుంటే మాత్రం సహించని స్థితి ఉంటుంది
పరాయిపాలనలో నికృష్టంగా ఉండే కష్టాలేమీలేవు ప్రస్తుతం , కానీ .. . ఈ “కానీ” కి చాలా అర్థాలున్నాయి. ఆ నాటి పరిస్థితులేవీలేని పరమ స్వేచ్ఛగా వెళ్ళదీసుకునే వీలున్నదిప్పుడు. కానీ…
భూగోళం మీద దాదాపు తొంభై శాతం ఆక్రమించి పాలించిన ఒక చిన్న దేశం బ్రిటన్! సూర్యుడు అస్తమించని బ్రిటీష్ సామ్రాజ్యం అంటూ ఉంటాము . అంటే ఏంటి ? అంటే బ్రిటన్ దేశం లో సూర్యుడు అక్కడ అస్సలే అస్తమించడా?కాదు! బ్రిటన్ లో కూడా సూర్యాస్తమయం అవుతుంది.మరెందుకు ఈ మాట అంటారు? అంటే, ప్రపంచం లో ఎక్కడచూడూ అన్ని దేశాలు బ్రిటిష్ వారి పాలనలోనే అప్పుడు ఉండేవి . భూమి ఎటుతిరిగినాగానీ అటు సూర్యుడు కనిపిస్తాడు ,సూర్యరశ్మి ఉంటుంది. ఆ ప్రాంతాలన్నీ బ్రిటిష్ ఆక్రమిత ప్రాంతాలుగానే ఉండేవి. దీంతో “సూర్యుడు అస్తమించని బ్రిటిష్ సామ్రాజ్యాన్ని “అని అనడం పరిపాటి అయ్యింది.
మన భారతదేశాన్ని కూడా బ్రిటషర్లు అలా యుక్తి , కుయుక్తులతో చేజిక్కించుకుని ఓ రెండు వందల సంవత్సరాలు పాలించారు. మనదేశ సంపద కొల్లగొట్టి, మనని మనుషులు గా చూడక అవమానపరుస్తూ హీనాతిహీనంగా చూసేవారు. అన్నదమ్ముల మధ్య , రాజ్యాలమధ్య , సంస్థానలమధ్య విభేదాలు సృష్టించి విభజించి , ఐదు ఆవులు ఒక పులి కథ లాగా మన పాలకులను అంతం చేసి తమ హస్తగతం చేసుకున్నారు. అన్నేళ్ళల్లో వాళ్ళు చేయని అరాచకం లేదు. మన విజ్ఞాన గ్రంథాలను, మన పండితులను ఎత్తు కెళ్ళి సంస్కృత భాషలో ఉన్న ఆయా శాస్త్రాలను ఇంగ్లీష్ లో కి అనువాదం చేయించి ప్రయోగాలు చేసుకున్నారు . ఆధునిక విజ్ఞాన సంపన్నులైనారు. మన దేవాలయాల లోని విగ్రహాలను ఎత్తుకెళ్లి వాళ్ళ మ్యూజియంలలో పెట్టుకున్నారు.అవి చూస్తున్నప్పుడు కడుపు తరుక్కుపోతుంది. అందమైన గాజు నిర్మాణాల్లో మన ఆధ్యాత్మిక అమృతవాహిని ని బంధించారు కదా అని మనసు అల్లకల్లోలమైపోతుంది.
ఇవన్నీ మేధావులకు తెలుసు . కానీ ఇవి తెలియని తరాలు వచ్చాయి . మారిన తరాలకు మన వీరులు , మన సైనికులు , మన నాయకులు పడిన కష్టాలు తెలియాలి. ఎన్ని ప్రాణాలు పోతే ఈ స్వాతంత్ర్య సాధించుకున్నామో తెలియాలి . లేకుంటే చాపక్రింద నీరులా వస్తున్న దేశ ద్రోహం మన పిల్లలకు ఈ కొత్త తరాలకు తెలియదు, అర్థం కాదు. ఆక్రమించే రూపం మారవచ్చు, అణగద్రొక్కే విధానం మారవచ్చు వాళ్ళ విషపు చూపులను పసిగట్టేందుకు కొత్త స్ఫూర్తి ఇప్పుడు అవసరం . వడ్డించిన విస్తరి అయింది మన దేశం . రేపటి రోజులలో “… చింపిన విస్తరి కావద్దు” ఇది ఈ అమృతోత్సవ శుభ సందర్బంగా మనం ఒకసారి గుర్తు చేసుకోవాలి . ఇది ఒక ప్రత్యేక అవసరం. మనకాలంలోనూ ఇప్పటికీ యుద్ధాలు జరుగుతున్నాయి. మనం చూస్తున్నాం కూడా! పరోక్ష యుద్ధాలు ఏవో సభ్యసమాజానికి తెలుసు . ప్రత్యక్ష యుద్ధం కూడా జరుగుతున్నది . ఆక్రమణకు గురయ్యే దేశం ఎంత , ఎన్ని విధాలుగా నష్ట పోతున్నదో తెలుసు. ఇవన్నీ దృష్టిలో పెట్టుకొని , గమనింపులోకి తెచ్చుకొని మనం మన దేశాన్ని ఎప్పటికప్పుడు కాపాడుకోవాలి. ఈ వజ్రోత్సవ సందర్భంగా మనమంతా , మన యువతరమంతా భారతదేశ సమగ్రతకోసం ఆలోచనలను పదునుపెట్టాలి. రేపటి తరానికి ఏ కష్టాలు ఇబ్బందులు కలుగకుండా ఉండేందుకు ఒక్క గొంతుకలం కావాలి . నా దేశ సర్వోన్నతి నేను ఏం చేస్తున్నాను అని నిన్ను నీవు ప్రశ్నించుకోవాలి, దేశ సుభిక్షత కోసం నేను ఏం చేయాలి అని నిన్ను ప్రశ్నికుని పూని ఏమైనా మేలు చేయాలి . అప్పుడే నీదే అనుకునే స్వతంత్ర భారత దేశం నీదవుతుంది.
అందరికీ డెభ్భై ఏళ్ల భారత దేశ స్వాతంత్ర్య దినోత్సవ శుభాకాంక్షలు. జై భారత్ !!
