Kura Bhanuja

ముసుగు కప్పేస్తుంది
ఏ దారిన వెళ్ళినా
నాని ముద్దవుతున్నాను
తడిసిపోయి ఏమారుతున్నాను
చుట్టూ వలయమై తిరుగుతున్నాను
కాస్త ఆగుదామని ప్రక్కకు నిల్చుంటే…
దారి మారిపోయి గమనం అగుపించడమే లేదు
విచిత్రంగా
గుర్తులైనా వెతుకుదామని
బయలుదేరా
అక్కడ …
దొరికిందో పుస్తకం
గ్రహణం పట్టిన బ్రతుకుకు
గమనం ఏదో చెప్పింది

మనసుతెరుచుకుంది ఈ క్షణం
చుట్టూ మనుషులు మూసుకుపోతున్న వేళ
సంతోషం పెదవులు దాటి కాదు
హృదయం దాటి అక్షరంలా పరుచుకుంది
టెక్నాలజీ నన్ను లోబరుచుకుంది
ఆకర్షణీయమైన హాంగులతో
నా చూపుల గాలాలతో
మెరిసిన జీవితంలో
అంధకారం కనిపించలేదు
కానీ ….
తెలిసినది ఇపుడే
జ్ఞానం ప్రకాశించిన వేళ
పుస్తకం తెరిచిన వేళ
సాహిత్యం నాలోనూ ప్రవాహంలా సాగుతున్న వేళ
ఒక్కో పదబంధం నా నాడులను ఉత్తేజితం చేస్తూ
మనిషివలె తిరిగి మానవతవైపు
లోకం వదిలేసిన చేయూత వైపు
చేరువగా పల్లె వైపు కన్నతల్లి లాలనలో
పుస్తకం ఊయలలో హాయిగా నా మస్తకం

యేండ్ల పోట్లాటలు
ఎరకలేని ఉన్మాదం
రేకెత్తుతున్నాయి మతజాడలు
ఏది మతం ఏది అభిమతం
ఎంచుకోవాలి మనమే
అన్నిమతాల సారమొక్కటే
మానవత్వమే మనిషితత్త్వం
మతచిచ్చులు మరవనిమచ్చలు

ఆవేశం ఆగ్రహం
అంతానికి సూచికలు
మా ఆలోచన ఆయుధమే కానీ
కాదు వెనుకబాటు
జనం మాకు సామాన్యం కాదు
అదే మా పౌరుషం

మా దేశతలం తలమానికం
కోల్పో నీచూపు
నుదుటిని వెలుగు చెరిపే నీ పైశాచికం
ఉగ్రవాదాన్ని ఉప్పుపాతరేసి
నింగిని తలచేలా నీ ఆయుధాల నిర్వీర్యం
నీకు తెలుసు మా యుక్తి
నీ తెలివి ప్రపంచాన లోకువయ్యింది
ఏదో చెల్లుబాటుకై నీ ప్రయత్నం
మా ధైర్యం
ఆపరేషన్ సింధూర్ గా
నీ నట్టింట్లో అడుగుపెట్టి
నీ ఉగ్రమూక
ఆనవాళ్ళను తొలగించిన తీరును
చూసావు కదా
నారీశక్తి నారీగళం ప్రపంచంముందు
ప్రచండమైంది

ఆసరాకై అగ్రరాజ్యాల పొత్తుచేరి
ఒప్పందం కూర్చుకుంటావు
మళ్లీ నీదైన
కుతంత్రపు బుద్ధితో
దొంగచాటుదాడులకు సైతం దిగుతావు
నీ కుతంత్రాలకివి
చెంపపెట్టు
ఉఫ్ ఉఫ్ అని ఊదితే నీ ఊసే ఉండదు

భారత నారి వీరనారి
ఒక్కో అడుగు వేల ఉదాహరణలు
తస్మాత్త్ జాగ్రత్త!

ఇది
కొత్తపదమైంది ఇపుడు!
పదాలు ఎపుడూ ఉంటూనే ఉంటాయి..
ఆవశ్యకత మాత్రం
కొన్ని సమయాలలోనే గుర్తొస్తుందా!

ఇచ్చే పర్మిషన్లు
పుచ్చుకున్నపుడు ఏమైందో??
కూల్చివేయడం చేతనైన పనే
బ్రతుకులు కూల్చేయడం సరైనదేనా??
అప్పులు తెచ్చి
ఆశలతో కట్టుకున్న
మధ్యబ్రతుకులు ఇవి!
ఎపుడూ మధ్యలోనే ఆగిపోవద్దని
ఒక్క అడుగు ముందుకేస్తే
హైడ్రా అనే వరద
మమ్మల్ని ముంచెత్తింది
కోలుకునే కొసమెరుపు
రానే లేదు
లేనే లేదు
రాజకీయం మారినప్పుడల్లా
ప్రభుత్వం మారినప్పుడల్లా
ఆశలు కాదు ఆశయాలు కాదు
బ్రతుకును చిదిమే భారం
ముంచుకొస్తుందనే భయం
ప్రజాస్వామ్య దేశంలో
పాలకుల పాలన
పరుగెడుతుంది ఎటువైపో
ఓటరు మిగులుతున్నాడెపుడు
మారుతున్న దారిలో మరుగునపడుతూ
ప్రశ్నలు మిగిలే ఉన్నాయి
FTL ఓటరుకేనా??
మరి ప్రభుత్వానికి??