కళ్ళు ఎప్పుడూ….
భావాలను తర్జుమా చేస్తాయి
కన్నీళ్ళు కళ్ళకు తోడై నిలుస్తాయి!
మాట మౌనం వహించినప్పుడు
మరో కొత్త భాషగా కన్నీళ్ళు!
మనసు అద్దానికి కళ్ళు ప్రతిబింబమైతే
కళ్ళ తో చెప్పలేని …
భావాల సమూహం కన్నీళ్ళు !
నిత్యం
అనేక సంఘర్షణల నడుమ నలిగిపోయి
హృదయం ద్రవించి కళ్ళనుండి ధారాపాతమై
దగ్ధమైన హృదయాన్ని చల్లబరుస్తాయి కన్నీళ్ళు!
ఓదార్పు మాటల ప్రవాహంతో
రాలుతున్న ఒక్కో కన్నీటి చుక్కా
పెదాలపైని చిరునవ్వుతో
అంతర్థానమవుతాయి!
కన్నీళ్ళు విలువైనవి
వాటిని దాచుకునే చోటు చిరునవ్వు!
