ఆశయకలలు

ఆశయాల ముందు ఆకలి గెలిచేస్తోంది 

భారమైన బతుకుల మధ్య     

ఆనందం కన్నీరు కారుస్తోంది

ఎన్నో వెలుగులేని రాత్రులలో

సన్నని చిరు వెలుగుకై పడే తపన 

నిస్సారమైన ఆ గాజుకన్నులకే తెలుస్తుంది.

ఆకాశంలో మెరిసే చుక్కల్ని చూస్తూ 

ఓ చుక్కైనా రాలదా సంతోషాన్ని 

పెదాల చివర మురిపించటానికని

ఎదురుచూసే మనసుకు తెలుసు 

తీరని కోరికని 

అయినా ఆశల దారాన్ని అందుకునే 

ప్రయత్నాన్ని మాత్రం ఆపకూడదనే 

గట్టి నమ్మకమే జీవితాన్ని నడిపిస్తుంది లోకంలో

అంట్లుతోమే చేతులకు అందించే 

పలకా బలపం ఖరీదు పెద్దదే

ప్రభుత్వ పథకాల్లో అందే ఉచితాలు 

మాత్రం కొందరికే 

అదృష్టవశాత్తు అందినా 

దురదృష్టం మాత్రం 

కన్నవారి కష్టాలకు….అవసరాలకు

తోడుగా వెన్నంటి అణగదొక్కేస్తుంటే  

ఆదరించే చేతులకోసం ఎదురు చూపుల్లో 

ఎన్ని పసి ప్రాణాలు వడిలిపోతున్నాయో

చేయుతనిచ్చే మానవ దేవతలు

దిగివస్తారని కలలు కంటూ 

Dr. సి. ఉదయశ్రీ