పోల్చడం ఎందుకు?
చిన్నప్పటి నుంచి చూస్తున్న
వాళ్లను చూసి నేర్చుకో
వీళ్లను చూసి నేర్చుకో
వీళ్ళలా ఉండు
వాళ్ళలా చదువు
వాళ్లు ఎంత ఎత్తుకు ఎదిగారు
మనం ఎక్కడ ఉన్నాము
వాళ్ల పిల్లల పెళ్లి అయ్యాయి
మన పిల్లల పెళ్లి ఎప్పుడు
వాళ్ల పిల్లలకు పిల్లలు పుట్టారు
మన పిల్లలకు పురుళ్ళు ఎప్పుడు
వాళ్ల పిల్లలు యూఎస్ వెళ్లారు
మన పిల్లలు ఎప్పుడు వెళ్తారు
వాళ్ళ అమ్మానాన్నను చూడు
వీళ్ళ నానమ్మలను చూడు
వాళ్లు ఎంత సంపాదించారో చూడు
వీళ్ళు ఇల్లు కట్టుకున్నారో చూడు
జీవితమంతా ఒకళ్ళతో పోల్చుకోవడమేనా
మనం మనలా పుట్టాము
మనం మనలా పెరుగుతాము
మనలో ఉండే తెలివితేటలు మనకు ఉంటాయి
మనకుండే ప్రజ్ఞ మనలో ఉంటుంది
కానీ ….
పోల్చడం ఎందుకు
ఇప్పటికీ అర్థం కాలేదు నాకు
చేతి ఐదు వేళ్ళే సరిగ్గా లేవు
ఒకదానికొకటి పొంతన లేదు
ఒక తల్లి పిల్లలము
ఎవరమూ ఒకలా లేము
మరి ఎందుకు పోల్చడము
వారిలానే నీవు ఉండు
వారిని చూసి నేర్చుకో
మన బుద్ధులు ఒకరిని చూసి నేర్చుకుంటే వచ్చేవా
పుట్టుకతో వచ్చిన బుద్ధులు
పుడకలతోటే పోతాయి అంటారు అయినా…
పోలుస్తూనే ఉంటారు
వాళ్ళు తొంభై ఏళ్ళు బ్రతికారు
వీళ్ళు వంద ఏళ్ళు బ్రతికారు
పోల్చడం ఎందుకు?
మనం మనది రాసుకొని పుట్టాం
మనం ఎన్నాళ్ళు ఉండాలో
అంతవరకు మనం ఉంటాము
కొన్ని తెలివితేటలు మనకు ప్రత్యేకంగా వచ్చాయి
అయినా ప్రతిసారి పోలుస్తుంటారు ఎందుకు
నాకు ఇప్పటికీ అర్థం కాలేదు ….
పోల్చడం ఎందుకో మనిషికి ?
ఎప్పటికీ నీవు నీవే
నీ ప్రజ్ఞ నీదే
ఎప్పుడూ నీకు నీవు
రాజు తోనో రాణి తోనో పోల్చుకోకు
నీ ప్రజ్ఞను నీవు కోల్పోకు
నీకు నీవే అధికారివి
నీకు నీవే ప్రజ్ఞా కారివి.
