అమ్మను దేవతగా పూజించే నా దేశంలో… ప్రతిదీ అద్భుతమే…
సాంకేతికతలో ఈ అవనిలోనే తలమానికమై
అలరారుతున్నా!
నైతికతలోనూ నా దేశం
అన్ని దేశాలకు ఆదర్శమే…
ప్రపంచ వ్యాప్తంగా ఆరోగ్య విషయంలో ఎన్నో
కొత్త ఆవిష్కరణలు చోటు చేసుకుంటున్నా
మన ఆధ్యాత్మికతతో అంటు కట్టుకున్న యోగా
విశ్వవ్యాప్తంగా ఆదరణకు
నోచుకోవడం ఆశ్చర్యమే-
చెట్టును పుట్టను గట్టును
గాలిని నీటిని వేటినీ వదలక
కళ్ళకద్దుకని ప్రకృతిని ప్రాణప్రదంగా
గౌరవించడం అపూర్వమే –
పుంఖాను పుంఖాలుగా పుస్తకాలను
వల్లే వెస్తే పుట్టలేదు ఇక్కడ భక్తి
మెదడు మొదళ్ళను తలుచుకొని
అనువంశికంగా మొలుస్తుంది
అది ఈ మట్టి శక్తి
ఒక చెంపపై కొడితే మరో చెంప
చూపించిన మహాత్ముణ్ణి గన్న
మన అవని – పరమ పావని
సౌశీల్య రాముణ్ణి రాజుగా కాక
దేవునిగా గుండెల్లో దాచుకున్న
ఈ దేశంలో పుట్టడమే మన భాగ్యం
నైస్వర్గికంగా కూడా మన దేశం
సర్వశ్రేష్ఠం అది మన సౌభాగ్యం!!
