ఆలోచనలు లో లోపలికి తెరలు తెరలుగా
గుడిలో ఓనమాలు
అయ్యగారి బడిలో అఆలు
అంతా కలిసి కొంతే
మందారపువ్వు సౌభాగ్యవతిగా నిష్క్రమణ
నిర్మలదీ అదేదారి పల్లెటూళ్ళలో అంతేమరి
అంబటాలకెళ్ళినజనం .
ఆజంజాహి సైరన్ తో తిరుగు ప్రయాణం
ప్యాటకా బిడ్డా! సీటీ కొట్టిందా
నూనె దీపాల తొందర సాయంత్రాలు
తొలివేకువలు; కావలసినంత పేడ
దారి కనిపించని దుమ్ము దుమ్ము
గై కర్రలతో కావలసినన్ని సీమచింతలు రేగులు
పతంగి గోళీలతో ఎండలో ఆటలు
నాటి సిర్రగోనెలే నేటి క్రికెట్
మోటబావులు ;స్నానాలు ఉన్నంతలో పచ్చదనం పరిశుభ్రం
గొల్లసుద్దులు చిందుభాగోతాలు హౌస్ ఫుల్
ఊరు మున్సిపాలిటైంది
గోకె ఉభయచరమైంది
తారురోడ్డుపై అభివృద్ధి తన్నుకొని వచ్చింది
అందం సుకుమారం చిక్కిచితికి పొయ్యాయి
దసరా రోజున చివరి దొరతనం సమాప్తం
వ్యవసాయం హమాలీగా మారింది
మున్సిపల్ నల్లాగా మారింది
ప్రశ్నలకు బెదిరి సాగుభూమి ఇండ్లప్లాట్లుగా
మారింది
మామూలు నారాయణ వీరాస్వాములు కోటీశ్వరులయ్యారు.
భూస్వంతదారులు ఉద్యోగపు పిందెలయ్యారు
ఉద్యమ భీభత్సం సారావ్యాపారంగా మారింది
అంత్యజుడే ఉద్యోగాల్లో అగ్రజుడయ్యాడు
కాలువలో పోయిన వట్టి భూములు
దశ దిశ మారిన యువజీరలు
సంఘనాథుడు దండనాథుడు సఫలీకృతులయ్యారు
సోమరాజోని బావి చామకూరపంపు గడ్డి పొలం చెరిగిన గుర్తులయ్యాయి
కాంక్రీటు ఆవాసాలుగా వ్యవసాయం మెటామార్ఫోసిస్
మెజెస్టీ ఛార్మ్ కో‍ల్పోయిన సికెయమ్ నెహ్రూ మెమోరియల్
కాన్వెంట్ పోటీలు అలారం గడబిడలు
అంతా పోష్ పాష్ హుష్ హష్
ఒయాసిస్ గా పరంజ్యోతి అవతారం
సానుభూతిని సత్వరం క్యాష్ చేసుకున్న సుతారం
-పేరు:డాక్టర్ కాసర్ల రంగారావు
