భారత్ కీ అవాజ్!!

వజ్రోత్సవ సంబరం
వీరుల త్యాగాల పునాదుల మీద మొలచిన స్వాత్రంత్ర ఫలం
దేశo దాస్య శృంఖలాల నుండి విముక్తి పొంది
స్వేఛ్చావాయువులు పీల్చిన చారిత్రాత్మక సందర్భం

పిల్లా పాపలను వదిలేసి
వీరతిలకం దిద్దుకొని ప్రాణాన్ని
తృణప్రాయంగా అర్పించిన
అమరవీరుల పోరాటాల త్యాగాల మీద ఎగురుతుందీ జండా
పొగరుగా!!
ఈ అద్భుత సంస్కృతిని ఒంటినిండా పూసుకొని
ఎగురుతుంది!!

ఒక్క నినాదం బక్క మనిషి
సంగ్రామం
ఒక్క విల్లు, పిరికెడు ఉప్పు
తప్పుల మీది నిప్పులు చెరిగిన భగత్ సింగ్
భారత్ కీ అవాజ్

తల్లిపాల రుచి
భూమి తల్లి సహనం
వారసత్వ శూరత్వం
ఝాన్సీరాణి అమరత్వం

ఈ గాలి లో
వేద నాదాల ధ్వని మారుమోగింది
ఈ మట్టి లో గంగా సారం
నమస్కారపు సంస్కారం

అందుకే ఈ దేశం వట్టి మట్టికాదు
సహనాన్ని చేతకాని తనమని అనుకోకండి
ఎదురు తిరిగే
మధ్యాందిన మార్తాoడం
ముష్కరులారా ఖబడ్దార్

వజ్రోత్సవపు అనుభవాల మీద
ఎగురు తోంది
త్రివర్ణ పతాకం
ధగద్దగాయమానంగా
దేశభక్తితో హృదయమంతా ఉప్పొంగగా
జై భారత్ అందాం
జైహింద్ అని నినదిద్దాం !!

మాడిశెట్టి గోపాల్
అధ్యక్షుడు సమైక్య సాహితీ