మనసు – మాట

వాళ్లిద్దరూ….
ఎంతో ఆత్మీయులు
అప్పుడప్పుడు
విడదీయలేని శత్రువులు

అంతరంగ జగత్తుకు
ఒకరు సాధికారులు
శబ్దాశ్రయంగా
బహిరంగ స్వరాధికారులు
వేరొకరు

లోతుల్లోని భావాల
మర్మం ఒకరైతే
భావ వినిమయ ప్రసారాల
చతురులు మరొకరు

ఆలోచనల సూక్ష్మత
ఒకరిదైతే
పెదవుల వాహకంగా
పరుగులు తీసే
ధ్వని తరంగాలు ఇంకొకరివి

మనసు చెప్పినా
మాట పలుకదు ఒక్కోసారి
వద్దంటున్నా
పలుకక ఉండదు మరోసారి
వీటి మధ్య మౌనం
మింగుతుంది కాలాన్ని
అనేకసార్లు

మనసు, మాటకు నడుమ
కావాలి మేలనం
అదే కరువైతే
వ్యక్తిత్వపు చిరునామాకు
తప్పవు అవమానాలు
అనుభవం ఎంతటిదైనా-!!

దాచుకోవాల్సినవి కొన్ని
దాపరికం ఉండకూడనివి మరిన్ని
ఏది తగునో?
ఏది తగువో?
పెదవి దాటడమంటే
మనసు స్వచ్ఛమై వికసించడమే !!