వృథా చేయకు నీటిబొట్టు

జలము జీవులకు ప్రాణాధారం
జలమే జీవక్రియలకు ఆధారం
వృథా చేయకు నీటిబొట్టు
వర్షం నీటిని ఒడిసిపట్టు…!

నదుల వద్దనే నాగరికత
నీటితోనే మానవుల భవిత
నీరుంటేనే పంటలు పండు
నీరు లేకున్న గొంతులెండు…!

ఒకవైపు నీటి వృథా
మరోవైపు గొంతెండే వ్యధ
నీరుంటేనే మనును జీవులు
నీరుంటేనే సాగును బ్రతుకులు…!

శుద్ధిచేసిన మురికినీటితో
పంటలు పండించే
ఇజ్రాయెల్ దేశాన్ని చూడు
ఎడారిలోనూ కూరలు పండించే
శాస్త్రీయ విజ్ఞానాన్ని స్వంతం చేసుకో
ఉప్పు నీటిని మంచినీటిగా మార్చే
ఆధునిక నైపుణ్యాన్ని అలవరచుకో
చుక్క చుక్కనూ ఒడిసిపట్టే
బిందుసేద్య పద్ధతులను ఆచరించు

ముందుతరాలకు తెలియజెప్పు
భూగోళంపై మూడు శాతం కన్నా
తక్కువున్న మంచినీటి ప్రాధాన్యతను
కన్నీటిపాలు కానీయకు
వారి సుందర భవితను…!!!

చంద్రకళ. దీకొండ,
మేడ్చల్ – మల్కాజిగిరి జిల్లా.