సద్దుల బతుకమ్మ

సృష్టికర్త ఆకుపచ్చని మగ్గాలపై అందంగా నేసిన జరీ నేతలు రంగుల పూలై కనువిందు చేసే పూల జాతర

పసుపు రాసిన గడపల్లోంచి
అలికి పూసిన లోగిళ్ళలోకి
అరుదెంచిన పుత్తడి బొమ్మ

గునుగు పూల అందెలు ధరించి గుమ్మడిపూల కిరీటం దాల్చి పసిడి కాంతుల్లో తళుకులీనే తంగెడు కొమ్మ

ఆరుబయళ్లలో విరబూసిన అడవి పూల సోయగాలకు జతగూడిన కాంతల కళానైపుణ్యంలో వెదురు బుట్టలో మెరిసిన ముద్దుగుమ్మ

పుష్పదొంతరల నడుమ పూలంగి సేవలో కొలువుదీరిన పువ్వుల బొమ్మ

రంగుల కోకలు దాల్చిన కలికి చిలుకలు పంచవన్నెల రామచిలుకలై శ్రీ గౌరీకి చేసే ఉయ్యాల సేవ

కొత్త కోడలికి అత్తవారింటి ఆత్మీయ వాయినం
తరువులమ్మ నదీమ తల్లికి సమర్పించే పూల వాయినం

సత్యవతీ ధర్మాంగుల ముద్దుల పట్టిగా వేములవాడకు వేంచేసిన బృహదమ్మ

గాజుల గలగలలు గజ్జెల చప్పుళ్లలో రమణులంతా గూడి రాగ సరాగాల్లో సందడి చేసే సాంస్కృతిక సమ్మేళనం

మంగళ వాద్యాల హోరులో కొవ్వొత్తుల వెలుగుల్లో బృహ దీషుని చేరుకోమంటూ చాళుక్యులు సదిగట్టి సాగనంపే సద్దుల బతుకమ్మ