కాలం vs విషయం

మరుగున పడిపోతుంది—
విషయమా?
కాలమా?
కాలం ఎప్పుడూ
ఒక శాశ్వత చలన యంత్రమే!!

విషయం మాత్రం
నాలుక మీద నానే
నువు గింజ లాంటిది!
విషయాన్ని కదిపితే
కాలo కర్రను జళిపిస్తుంది,
పలకరిస్తే చాలు—
పగటి సూర్యుడిని
రాత్రికి మొలిపిస్తుంది!!

కాలం రెక్కల మీద
విషయం సవారీ చేస్తుంది—
నలుగురు కూచున్న అరుగుమీద
మద్దెల మోతలా
మారుమోగుతుంది!!

అరే… చెప్పకముందే
చెవులు నోళ్లకు అప్పగించాయి,
చెంపలు వెక్కిరిస్తున్నాయి,
చేతులు ముడుచుకున్నాయి!!

విషయం కోసమే
ఎదురుచూసి మోసే
పక్కింటి నోళ్లు…
వాటికి నిజం అక్కర్లేదు!
కాలపు వంతెన మీద
నడిచే దారిని
చూడలేని కళ్లవి!!

విషయం శరీరమైతే—
కాలం దాని వయసు!
కాలం మారేకొద్దీ
విషయంపై
నలుపు చారలు పడతాయి;
నిన్నటి నిజం
నేటి నీడగా మారుతుంది!!

కదిలే కాలప్రవాహంలో
విషయం ఒక నావ—
అది ఊగిసలాడే
భావాల రెక్కలపై
దాని తండ్లాట!!

కవిత్వం తీగ మీద
నడిచే కాలానికి
నిద్ర ఉండదు;
విషయానికి
గొంతు పెగలదు!!

కాలం కదలకపోతే
విషయం విచ్చుకోదు;
విచ్చుకోని పువ్వుకు
విజయపు పరిమళం ఉండదు,
జీవితానికి వ్యాఖ్యానం ఉండదు!!

కాలమే విషయానికి ఊపిరి,
విషయమే కాలానికి ముఖచిత్రం!
కాలం నడుస్తూనే ఉంటుంది—
విషయాలు మారుతూ ఉంటాయి;
కానీ…
నిజం మాత్రం
కాలపు పొత్తిళ్ళలో
ఏదో ఒకరోజు
మళ్లీ మొలకెత్తుతుంది!!