కపటం – కాలనాగు

కపటం కాలనాగై
కాటేస్తున్నది సమాజాన్ని
హద్దులు లేని మోసాలు
కలచివేస్తున్నవి ఎందరినో !

అనంతకోటి ఉపాయాలు
చిత్రవిచిత్ర పోకడలు
అంతుచిక్కని వలలు
అడుగడుగునా మోసాల జాడలు

లేచింది మొదలు
ఎక్కడి నుంచో వల విసురుతోంది కపటత్వం
ఎవరి విషకల్పనలో
ఎవరి దుర్మార్గాలో
మన వివేకం ఎట్లా బందీ అవుతుందోనని
ఎవరూ చెప్పలేని కాలమిది

కల్తీ పాలు కల్తీ సరుకులు
ఆన్‌లైన్ మోసాలు
కపటాల ముళ్లు పేరుస్తున్నది
లోన్ల పేరుతో
పెట్టుబడుల పేరుతో వలలుపన్నుతున్నది

అధిక వడ్డీ ఆశ చూపించి
అదను చూసి పంజా విసిరే
ధన రక్తం రుచి మరిగిన మానవ వ్యాఘ్రాలు

అమాయకులను మింగే తిమింగలాలు
అమ్మాయిల పాలిట రాక్షసులొకవైపు
మరోవైపు…
విషకన్యలుగా మారిన కొందరు—
విలువలు మసకబారిన
నవ్య సమాజపు ప్రతిబింబాలు

ఎత్తుకు పైఎత్తులు వేసే
గుంటనక్కల మాయాజాలం
ఎదుటివాడి సొమ్మును
సులభంగా కొల్లగొట్టి
స్కాముల సామ్రాజ్యాలు కట్టే
కపట నటులు
కాలం కఠినం..
కంచే చేనును మేసే
నమ్మకద్రోహుల మధ్య
సాగిస్తున్నాం జీవనం

దురాశ దుఃఖానికి మూలమనెందుకన్నారో…

సమయస్ఫూర్తి కవచంతో
వివేకమనే ఖడ్గంతో మనలోకి మనం అవలోకనం చేద్దాం
విశ్లేషణ శక్తి విజయాయుధమవ్వాలి

ఎక్కడి నుండి ఏ రూపంలో వస్తాయో ఈ ప్రమాదాల పన్నగాలు
పన్నాగాలు పన్నే
కపటాల కాలనాగులను జయించాలంటే
అప్రమత్తతే ప్రతి మనిషి ఆయుధం
నిజాయితీ ఒక్కటే నిశ్చల కవచం
జాగృత సమాజానికిది తెలవాలా?
తెగువ మనదైతే
తెలివి బహుముఖాలు!