ప్రఖ్యాత చిత్రకారులు డా|| కొండపల్లి శేషగిరి రావు గారు చిత్రించిన సీతారామ కల్యాణ చిత్రం

డా|| కొండపల్లి శేషగిరి రావు

కొండపల్లికులాంభోధి
రాకాశ్రీకరచంద్రమమ్
చిత్రకారగణేశానమ్
భజే శేషగిరిం బుధమ్.

తాత్పర్యం: – కొండపల్లి వంశ మనే పాలసముద్రానికి పూర్ణిమ అనే లక్ష్మీకళను కలిగించిన చంద్రుడు, చిత్రకారులసమూహాలకు ప్రభువు, (చిత్రలేఖన కళలో)పండితుడు అయిన శ్రీశేషగిరిరావును భజస్తున్నాను.

(“సీతారామ కళ్యాణం” చిత్రించిన కొండపల్లి శేషగిరి రావు గారిని కీర్తిస్తూ వ్రాసిన శ్లోకం – సం)

‘రంగనాథ రామాయణం’ లోని వర్ణన

శ్రీ సీతా రామకళ్యాణము
ఖచితోరునవరత్న కల్యాణవేది, నుచితపీఠంబున నున్న చో బ్రీతి
దనపురోహితునితో దడయక జనకు, డనలు బ్రతిష్ఠించి హైమ వేదికను
వేదోక్తగతి హోమవిధు లాచరించి, యాదేవకన్యక లన నొప్పు తనదు
కన్యకామణుల నగణ్యలావణ్య, మాన్యల నలుపుర మైత్రి రావించి
జనకుండు మధుపర్కసమయంబు దీర్చి, తన కూర్మిపుత్రి సౌదామనీగాత్రి
గామినీజనమణి గమలాక్షి సీత, గోమలి దెరమఱుంగున వేడ్క నిలిపి
రామాభిరాము డారామచంద్రునకు, గామిత సిద్ధి సంకల్ప పూర్వముగ
శ్రీ రామ నా పుత్త్రి సీత సద్ధర్మ, చారిణి గొను మగ్ని సాక్షిగా ననుచు
దారవోసెను దేవతాపుష్పవృష్టి, ధారతో దివ్యవాద్యధ్వనుల్ మీఱ
బ్రమదంబుతోడ దీపముల పళ్ళెములు, సమదయానలు మహాసంభ్రమంబునను
దలంబ్రాలు బంగరు తబుకుల నునిచి, కెలంకుల రమణులు కెరలుచు బట్ట
గుడముతో జిిల్కఱ గూర్చి యిద్దఱకు, వడి శిరస్సులమీద వలనొప్ప నుంచి
రంతట సుముహూర్తమని తెరదీయ, గాంతనెమ్మోము మున్గనుంగొని యలరె
రామునికను గన రాకాసుధాంశు, గోమున నలరెడు కుముదంబు లనగ
భామచూపులు నిల్చె బతిపాదయుగళి, దామరపై తేటి తండంబపోలె
నింతిలావణ్యాబ్ధి కెదురెక్కుమీన, సంతానమై రామచంద్రుచూపడరె
వరుదేహకాంతి ప్రవాహ మధ్యమున, దరుణిచూపులు పద్మదళములై గ్రాలె
సతిచూపు బతిచూపు సరసత జూపు, రతి రూపు రతిమనోహరమణుని రూపు

-గోన బుద్ధారెడ్డి