నా తెలంగాణ

సీ: జనములు మెచ్ఛంగ జనపథమ్ములు కొన్ని
దేదీప్యముగను వర్దిల్లె నిచట
దేశ విదేశ యాత్రికులతో రాజ్య వై
భోగమ్ములే మారిపోయె నిచట
భారతీయ కథా ప్రభల్ మీరహాలుండు
మంచి కథల్ సంకలించె నిచట
పురుషులెల్లరు చిన్నవోవంగ రుద్రమ్మ
అధికార పగ్గాలనందె నిచట

తే. గీ:మనుమసిద్ధి మహారాజు మాట మీద
సైన్యమంపించి గెలిపించ జాలి రిచట
వేయి మాటలాడగనేల విశ్వమెల్ల
వజ్ర వైడూర్యముల పాలు పంచె నిచట

చ:పలుకులలోన తేనెలు ప్రవాహములై పరుగెత్తుచుండ ప
ల్లెలు తెలుగమ్మలై పులకరించిన కమ్మని జ్ఞాపకాలు విం
దులు గయి సేయునిప్పటికి-దున్నిన చాలును చాలు చాలులో
తెలుగు మహా చరిత్ర నినదించదె! ఇచ్చటి నేల లోపలన్

సీ: ఘనమైన శాతవాహన రాజ్య భూభాగ
మున చిన్నపాయగా మొగ్గదొడిగి
ఓర్గల్లు కాకతీయుల యేలుబడి లోన
చిన్ని పాదాలతో చిందులేసి
కుతుబు షాహీల పద్ధతులతోచెయి గల్పి
నాల్గు మినార్లపై నాట్యమాడి
శాంతి తోడుత నసఫ్ జాహి కాలమ్మున
మంచి చెడులలోని మర్మ మెరిగి
తే. గీ.పక్క రాష్ట్రాల వారితో బాధలొంది
తెలుగు తమ్ములతో కొంత దిగులు జెంది
నాటి గడ్డకై తెగని పోరాట మంది
గాంచె రాష్ట్రమ్ము నా తెలంగాణ తల్లి

క: తెలుగుం భాషకు నెలవై
తెలగాణమ్మన్నపేరు దేదీప్యమ్మై
వెలిగిన ఒకనాటి చరిత
కలుగుల్లో నుండి నేడు కన్నులు దెరిచెన్

సీ:పాల్కుర్కి మొదటి విప్లవ కాంతి రేఖలో
కొత్త వెలుంగులు కుమ్మరించి
మొదటి రామాయణమ్మున కూపిరూదగా
గోన బుద్ధారెడ్జి కానతిచ్చి
పోతన్న కైతలో పొంగులెత్తిన సుధా
మధురాక్షరములకు మాట నేర్పి
చిత్ర భారత కృతి స్వీకరింపగనెంచి
చరిగొండ ధర్మన్నకెరుక జెసి

తే. గీ. పాన్నిగంటి కవిత్వానపొంగి పొరలి
రామదాసు శ్రీరామ కీర్తనల దేలి
ఆ మరింగంటి యింటిలో నాట లాడె
ఈ తెలంగాణ తల్లి సాహిత్య వల్లి

మ: కలరీ నేల ప్రసిద్ధులెందరొ!జగత్కల్యాణమాశించి గుం
డెలలో నెత్తురు ధారవోసి ప్రమిదల్ నిండార వెల్గించి పే
దల చీకట్లను పారదోలిన చరిత్రల్ నేటి కాదర్శమై
తెలగాణమ్మును కొత్త తీరముల నుద్దీపింపగా జేయుతన్