సహన భారతం

సీ:కులము కులమటంచు కులుకుచుందురు గాని
                            కోరికవడి తెచ్చుకొనిరె కులము
   మతము మతమటంచు కతలుజెప్పుదురెల్ల
                           వారి మతములొక్క తీరు గాదె?
    ధనము నాకేయున్నదని గర్వ మేలకో?
                           పైసలనేదిని బతుకగలమె?
    అధికార బలమున్నదని తుల్లెదరు నాయ
                           కుల జేసినది ప్రజాబలము గాదె?

తే:  ప్రజల కన్నీటిలోని ఆపదలనెల్ల
   తీర్పజాలిన నాడు-విద్వేష బుద్ధు
   లింకిపోవవే? కాని నెడెందు జూడ
    నాయకులె రెచ్చగొట్టుట నడుచు చుండె

చ:మతముల పేరుజెప్పుకొని మారణహోమము రేపి చీకటుల్
    బతుకులలోన నింపుట-శవమ్ములపై పడు చిల్లరేరు దు
    ష్కృతములు సాగవెల్లపుడు-కిందిది పైనది కాకపోదు-స
    మ్మతములు తారుమారుగను మారక పోవునె?భారతావనిన్

ఆ:మతములోన గలుగు మానవత్వమ్మును
    గొంతుబిసికి చంపి గోతి లోన
    పూడ్చిపెట్టి సుద్ద పూసమాటలు నేడు
    చెప్పు చుండ్రి లేని గొప్ప కొరకు

క: పరమతములపై పడి యె
    వ్వరు’దూషింపండి’యనుచు ప్రవచించిరి నె
    త్తురులను పారింపుమనుచు
    విరచించిరె గ్రంథముల పవిత్రత నెరుపన్

ఆ:మధ్యలోన పుట్టి మధ్యలోనే పోయె
    గతమునందు కొన్ని మతములవని
    మానవత్వమనెడు మతమొక్కటే మాన
    వాళితోడ చివరి వరకు నిలుచు

తే:చెట్టుపై కిచకిచలాడు పిట్టలందు
    కులము మతములు గలిగెనే? కుట్రలేవి
    యేని పొడసూపెనే?లేని పోని లొల్లు
    లొక్క మనుషులందే కల్గియుండుటేమి?

తే:మనది ఉపఖండమని చెప్పుకొనుచు
    పక్క వారి సంస్కృతి కించపరుచ నేల?
    మాలలో తీరుతీరైన పూలు గలుగ
    చూడ ముచ్చట గొల్పదే శోభ హెచ్చి                   –