సింధు హృదయం

నా ఎద జ్వలించి
బడబానలమైనపుడు..

నా మదిలో తుఫానులు
విజృంభించినపుడు….

నా కన్నీళ్ళు  ఉప్పెనలై
ఉప్పొంగినపుడు..

నా  ఉచ్ఛ్వాస నిశ్వాసాలు వాయుగుండాలై
చుట్టుముట్టినపుడు..

నాలో దూసుకొని వచ్చే నదీ రుధిరాలు ఉప్పగా మారివెచ్చగా తాకినపుడు..

నా గుండె సుడిగుండమై
ధ్వనించినపుడు

నా నీలిమ నల్లని దుఃఖపు దుప్పట్లు
కప్పుకొన్నపుడు..

నా కెరటాల పాదాలు విరిగి పడుతు
నడవలేనప్పుడు.

నా ఆశలు నిండు పున్నమి చంద్రునికై ఎగసి
నిరాశ శకలాలై విరిగినపుడు..

నా లోని ముత్తెపు సిరులు నత్తగుల్లలై
నవ్వినపుడు

అనుభవాల హాలాహలాలు..
బాధల బడబానలాలు
కష్టాల తిమింగలాలు
నన్ను ఉక్కిరిబిక్కిరి చేస్తున్నపుడు
నాలో నేను మదనపడుతు..

అలల అక్షరాలతో సృజించిన
కావ్యం..
నీకు అమృతం కావాలనే తపనతో
బతుకుతున్నాను..

       *