తెలగాణ కవిరాజు దులిపె నైజాం బూజు
కొదమ సింగంబయ్యి అదిలించె నక్కలను
రుద్రవీణను మీటి నిద్రాణ తెలగాణ
ప్రజల గుండెల జొచ్చి ధ్వజమెత్తె గొంతుకై
తెలుగు సాహితి జనని తిరువడుల మదినింపి
నవ్య రీతుల కవిత నావిష్కరించెనిట
దుష్ట ఖాసిం రజ్వి దురిత చేష్టలనాప
నెదిరొడ్డి నినదించె ఎర్ర సూరీడోలె
ఇందూరు జైలులో బంధింపబడి, యందు
బొగ్గులను రాజేసి పుట్టించె కవితలను
పోతన్న తోటలో పుణికి పూసిన సుమము
వెదజల్లె రాజరిక వ్యతిరేక పరిమళము
పద్దేలతో నిజాం గద్దె వణికించితివి
వీరకవి సింహమా! వీర తెలగానమా!
గజలు గీతాలకూ గమకాలు జోడించి
తెలుగు వాణి మెడలో వెలుగు దండేసితివి
నమస్తే సారధీ! నమస్తే కవితాబ్ధి!
నమస్తే దాశరథి! నమస్తే! నమస్తే!