ఆపిల్ నుంచి ఆకాశం దాకా

అప్పుడెప్పుడో
న్యూటన్ నాలోకి విసిరిన
ఆపిల్ పండే
ఇవాళ కవిత్వమై
మీ ముందుకొచ్చింది

చిక్కులు చిక్కులుగా కనిపించే
ఐన్ స్టీన్ సాపేక్ష సిద్ధాంతం
చిందర వందరవుతున్న
ఈ జీవితాన్ని
అర్థం చేసుకోడానికో
గొప్ప వరంలా దొరికింది

సూర్యుడు,గ్రహాలు
భూమి,చంద్రుడు
ఇవన్నీ
విశ్వమంతా ఒక్కటేనన్న
నినాదాన్ని
నిరూపిస్తున్నవి

తెల్లని కాగితం మీద
అక్షరాలను అందంగా
అచ్చొత్తగలుగుతున్నామంటే
కారణం తెలిసిందేగా

ప్రకృతి
పర్వతాలు
లోయలు
పచ్చని చిగుర్లన్నింటి మీద కురిసే
గోళాకార చినుకుల్లో కూడా
సైన్స్ దాగుందన్న విషయం
తెలియనిదా

గుండెను తీసి గుండెను పెట్టే
రోజులొచ్చాయంటే
సంభ్రమాశ్చర్యం!
మనసును తీసి మనసును పెట్టే
రోజులు కూడా
భవిష్యత్తులో ఉండొచ్చేమో

చంద్రమండలం మీదికి అడుగుపెట్టి
అక్కడి మట్టిని ముద్దాడుతున్నామంటే
మనిషి మరో భూమిని
సృష్టించుకున్నాడనేగా

సైన్స్ ఎక్కడో లేదు
నీ,నా  పక్కనే ఉంది
నీ,నా వెంటే ఉంది
చేతిలో అందంగా
నిత్యం అలంకరింపబడే
సెల్ఫోన్ లా
ఎన్ని యుగాలైనా
నన్ను,నిన్ను వీడనంటుంది