జ్ఞానోదయం

చిట్టి కథ గొప్ప సందేశం
ఒకరోజు ఒక బోయవాడు అడవిలో వేటకు వెళ్లాడు . అతడు కొన్ని పావురంలను వేటాడు సాయంత్రం ఇంటికి తిరుగు ముఖం పట్టాడు దారిలో ఉరుములు మెరుపులతో కూడిన వర్షం మొదలై దారంతా జలమయం అయ్యింది. అప్పుడు ఆ వేటగాడు గబగబా ఒక మర్రి చెట్టు కింద తలదాచుకోవడానికి వెళ్ళాడు. వేటగాడు మర్రి చెట్టు కిందకు వెళ్లిన తర్వాత ఆ మర్రి చెట్టుకు ఒక వాగ్దానం చేశాడు. నన్ను విపత్కర పరిస్థితి నుండి ఈరోజు నువ్వు కాపాడినట్లయితే నేను రేపటినుండి వేటను వదిలేస్తాను ఇంకా ఏ కష్టమైనా చేసుకొని బ్రతుకుతాను ఈ జీవహింస చేయను అని అమరు చెట్టుకు వాగ్దానం చేస్తాడు. కాసేపటికి వాన కొంచెం తగ్గుముఖం పడుతుంది.అప్పుడే పైన చెట్టు మీద గుడి కట్టుకొని నివసిస్తున్న ఒక మగ పావురం మేత కోసం వెళ్లిన ఆడ పావురాన్ని తలుచుకొని దుఃఖిస్తుంది. అయ్యో!!! మేత కోసం వెళ్లిన నా భార్య ఇంకా రాలేదు ఏ ఆపద వచ్చిందో తనకు అని బాధపడుతుంది. ఇంతలో చెట్టు క్రింద వేటగాడు వేటాడి తెచ్చి పెట్టుకున్న పావురాలలో ఈ మగ పావురం భార్య అయిన ఆడ పావురం కూడా ఉండి మగ పావురం మాటలను వింటుంది. ఆహా!! నా జన్మ ధన్యం. నా భర్తకు నా మీద ఉన్న ప్రేమను ప్రత్యక్షంగా చూడగలిగాను. మొదటి అదృష్టవంతురాలిని అని అనుకుంటుంది. తనకోసం వ్యాకులత చెందుతున్న భర్తను చూసి జాలి వేసి ప్రేమగా అరుస్తుంది. ఆడ పావురం అరుపును గమనించిన మగ పావురం చెట్టు కిందకు వంగి చూస్తుంది. అక్కడ తన భార్య అయిన ఆడ పావురాన్ని చూసి చాలా సంతోషించి అది కూడా అడపావురం వద్ద వాలుతుంది. భర్తను చూసిన ఆడ పావురం మగ పావురంతో ఈ విధంగా అంటుంది. ఈ చెట్టు పైన మనం గూడు కట్టుకొని నివసిస్తున్నాం కనుక ఇదే మన ఇల్లు ఈ వేటగాడు మన ఇంటికి వచ్చిన అతిధి. కనుక నీవు అతనికి అతిధి మర్యాదలు చేయి అని మగ పావురంతో చెప్తుంది. మగ పావురం అలాగేనని అయ్యా!!! ఇది మా ఇల్లు. మీరు మా ఇంటికి వచ్చిన అతిధి. అతిధికి అతిధి మర్యాదలు చేయాల్సిన బాధ్యత కూడా నాదే కనుక మీకు నేను ఏ విధంగా మర్యాదలు చేయగలను తెలియజేయండి అని అడుగుతుంది మగ పావురం. అప్పుడు ఆ వేటగాడు ఇప్పటికైతే నాకు చాలా చలిగా ఉంది చలిని తగ్గించడానికి ఏమైనా చేయగలిగితే చేయి అని చెప్తాడు. అది విన్న మగ పావురం వెంటనే చెట్టు కింద అక్కడక్కడ పడి ఉన్న చిన్నచిన్న కర్ర పుల్లలను తెచ్చి చలిమంటను వేస్తుంది. వేటగాడు కాసేపు ఆ చలిమంట కాచుకొని కాసేపు ఆగిన తర్వాత తనకు బాగా ఆకలిగా ఉందని చెప్తాడు. అది విన్న మగ పావురం అయ్యా!!! మాకు ఆకలి వేస్తే అప్పటికప్పుడు వెళ్లి ఆహారాన్ని సేకరిస్తాము దానినే తింటాము. మీ మానవుల లాగా మేము ఆహారాన్ని దాచుకోము. కానీ మీరు పక్షులను వేటాడి తింటారు కదా!!! అయితే ఇప్పుడు నేను చేయగలిగింది ఒక్కటే నేను ఈ మంటల్లో దూకి మీకు ఆహారాన్ని అవుతాను స్వీకరించండి అంటూ…. మగ పావురం ఆ మంటల్లో దూకుతుంది. అది చూసిన వేటగాడు చలించిపోయి ఛీ!! పక్షికి ఉన్న పాటి జ్ఞానం కూడా నాకు లేకుండా పోయింది. అతిధి మర్యాద చేయడానికి వేరే దారి లేక అది పక్షి అయినప్పటికీ దాని ప్రాణాన్ని త్యాగం చేసి నాకు ఆహారంగా మారింది. మరే విధంగానైనా ఆహారం సంపాదించుకోగల శక్తి సామర్థ్యాలు కలిగిన నేను మాత్రం మూగ జీవులను హింసించి వాటిని ఆహారంగా సేకరిస్తున్నాను. నా మీద నాకే అసహ్యంగా ఉంది .అనుకొని వలలో ఉన్న పావురాలన్నింటిని ఆకాశంలోకి విసిరేస్తాడు. అన్ని పావురాలు గాల్లోకి సంతోషంగా ఎగిరిపోగా ఆడ పావురం మాత్రం అతిధి మర్యాద కోసం ప్రాణత్యాగం చేసిన భర్తను తలుచుకొని దుఃఖిస్తూ తను కూడా ఆ చితిమంటలో దూకి ఆత్మర్పణం చేసుకుంటుంది. అప్పటికే ముక్తిని పొందిన మగ పావురం దేవలోకంలో బంగారు విమానంలో కూర్చుని ఎదురుచూస్తుంది ఆడ పావురం కోసం. భార్య మాట కోసం భర్త ,భర్త కోసం భార్య ఒకరికొకరు త్యాగాన్ని ప్రదర్శిస్తారు. మనల్ని నమ్మి ఆశ్రయించి వచ్చిన వారికి ఆశ్రయం కల్పించి అతిధి మర్యాదలు చేసినంత మాత్రము చేత పక్షులైన పావురాలకి మోక్షం కలిగింది. మనం చేసిన మంచి ఎప్పటికీ వృధా పోదు అనటానికి ఈ కథ ఒక నిదర్శనం. కథ కల్పితమే అయినప్పటికీ విని నేర్చుకోవాల్సింది చాలా ఉంది ఈ కథలో. మనం మంచి విషయాన్ని స్వీకరించాలి అనుకున్నప్పుడు అది కథన, కల్పితమ, వాస్తవమా చూడాల్సిన అవసరం లేదు. సందేశాత్మకంగా ఉన్న దేని నుంచైనా మంచిని నేర్చుకోవచ్చు . చిట్టి కథ గొప్ప సందేశం. మిత్రులందరికీ నచ్చుతుందని అనుకుంటున్నాను. నాకు నచ్చే మీ అందరితో పంచుకోవాలనే ఉద్దేశంతో రాయటం జరిగింది.

(సామాజిక మాధ్యమం నుండి సేకరణ)

సర్వేజనా సుఖినోభవంతు