అనుభూతి పరిమళాలు

మా బడి గుడిగంటల మోత గుర్తొచ్చినప్పుడల్లా తెలియని భావమేదో మదిలో మెదులుతూనే ఉంటుంది

తలుపులు తెరిచి కొత్త తరగతిలోకి రారమ్మంటున్న భావమేదో లీలగా
కదలాడుతూనే ఉంటుంది

నాన్న తెచ్చిన కొత్త పుస్తకాలు తెరిచినప్పుడు ముక్కుపుట్టల్ని తాకిన వింత వాసనలు …

అట్టలేసే సమయంలో జాగ్రత్తల చిరు హెచ్చరికలు ఇంకా చెవుల్లో మెల్లగా వినిపిస్తూనే ఉన్నాయి

బుజ్జిమేక పూల తోటలో తిరుగాడే చిత్తరవు కళ్ళముందు వింతగా ఇంకా సజీవంగా!

అమ్మ చెప్పిన ‘పాపాయి స్నానం’ కథలోని ఆరోగ్య రహస్యాలు బిబ్బీలడబ్బీ మతలబేంటని అమాయకత్వం నటిస్తూ అడిగిన
అక్క నటనాచాతుర్యానికి
అమ్మ మురిపెంతో చెప్పిన సమాధానం చెవులలో
ఇంకా పదిలంగానే!

కొత్త పుస్తకాల సంచితో
బడికి వెళ్ళినప్పుడు
నెచ్చెలుల మనోగతం
కాసింత అవగతమై …

ఒకింత విజయగర్వంతో
చేసిన అవివేకపు తప్పిదానికి అపరాధభావం ఇంకా
ఎక్కడో తడితడిగా అలాగే

టీచరమ్మల బెత్తపురుచుల్ని చవి చూడకున్నా
ఆటల సారు కోపానికి అరచేతులు బలైన
సందర్భాలు బోలెడన్ని

నాన్న బదిలీల మజిలీలో
కొత్త స్నేహాలు సంబరాన్నిచ్చినా దండించే గురువులు మదిలో మెదిలి కలవరపడ్డ
క్షణాలు చాలానే!

హెచ్చుతగ్గుల తేడాలు
ఎంచరాదంటూ నాన్న చేసిన నీతిబోధలు …

పెద్దలు కనబడగానే రెండు చేతులు పట్టుకుని జోడించడం నేర్పిన నాన్న సంస్కారానికి …

చదువుతో పాటు సాహిత్యంలో ఓనమాలు నేర్పిన తెలుగు మాస్టారుకు వందనాలు

తల నెరుస్తున్నా చదువులమ్మ గుడి తలుపుల మాటున దాగిన తలపులు ఇంకా కొత్తగానే!