నాటికి ఈనాటికి

ఏడాదికో కొత్త పేరు
సౌందర్యమంతా పచ్చదనంగా పరుచుకొని
మనకోసం ఎన్నెన్నో ఒడిలో నింపుకొని తెచ్చే
చైత్ర వరలక్ష్మికి స్వాగతం

కాలపరిణామాల్లో
క్రమానుగత రుతువుల మార్పులో
శిశిరానిది పెద్దబాధ్యత
కష్టకాలంలో కలత విలాపాలను రాలుస్తూ
ఉజ్వల భవితను కాంక్షిస్తూ
వసంతానికై సర్వం సిద్ధం చేసి
చిగురు నవ్వులు వినపడగానే
సెలవు తీసుకుంటుంది.

అనుభూతులేవైనా ఎప్పుడూ మారని జీవికలు
జీవితపు కుండలో షడ్రుచుల అనుభవాలు
మనసు కొమ్మల్లో రాగాలు
వసంత సంతస వేదికలపై
కవితాగానం చేసే కవికోకిలలు

అందం ఐక్యత స్వచ్ఛత సౌభాగ్యం
ఓ ఉగాది పర్వమా నీదే!
నీవు ఎప్పుడూ మారలేదు
ప్రకృతి జీవులేవి మారనేలేదు
ప్రకృతి జీవితత్వాన్ని అలవర్చుకోలేక
మనిషి మాత్రం అహంకారిగా మారిపోయాడు
నాలుగు తరాల ముచ్చట్లను
కలబోసుకుని ఆరబోసుకున్న వాకిళ్లు
నిశ్శబ్దపు నీడల్లోకి జారిపోయాయి
ఆధునికత పెరిగిన నాగరికతలో
వాడి పడేసే సంస్కృతిలో
ఆత్మీయ బంధాలు కూడా చేరిపోయాయి
పిల్లల లేత చేతుల్లో
చరవాణి ప్రపంచం
ఆన్లైన్ వేగంలో అన్ని పారేసుకుంటున్నాం
సాంస్కృతిక వైభవాలను వదిలేసుకుంటున్నాం
పంచుకుంటే అనుభూతులు
తుంచుకొనిపోతే జ్ఞాపకాలు
వాటికి కూడా కరువుతనం
అంతాఏకాకితనం పరాయితనం
విద్యుద్దీపాల కాంతులున్న
దారి కనిపిస్తలేదు గుండె గూళ్లను చేర
మనిషి పరిమళిస్తేనే లేడు
యుద్ధభయాలు దగ్ధ జీవితాలు
ఓ పరాభవ వత్సరమా!
ఎన్నని చెప్పను?
పెత్తనాల పరాభవాలు
పాపాలతో ధరాభారాలు
ధర్మం తప్పుతున్నదీ మేమే!

ఏది ఏమైనా, తెలుగుతనానికి నిండు వెలుగువై వచ్చిన
నీవే మాకు స్ఫూర్తివి
నీశుభ ఆగమనానికి స్వాగతం
పరాభవమా! నీకు మా స్వాగతాంజలి