దశాబ్దాలుగా వాడి చుట్టూ వుంటూనే
వాణ్ని తప్పించుకు తిరుగుతున్నాను

నా వోడేనని తెలుస్తున్నా, పోవోయ్ అంటూ
దారి మార్చి తిరుగుతున్నా
అయినా వాడు నాలో
ఎక్కడో తిష్ట వేసుకు కూర్చున్నాడు

అకస్మాత్తుగా ఒక రోజు
నా దేహం పై కత్తి పడింది
శరీరం తో పాటు మనసూ గాయ పడింది

వాడు లేచి గాయాల్ని తడిమాడు
కళ్ళల్లోకి చూసి కన్నీటి పర్యంతమయ్యాడు

హృదయం లోకి దూరి
బాధలకు మలాం రాసాడు

నా చేయందుకుని అక్షరమై
తెల్ల కాగితం పై వాలాడు

వేదనంతా దూదిపింజై
గాల్లోకి ఎగిరింది

ఇన్నేళ్ళూ నేను తప్పించుకు తిరిగినా
ఇవ్వాళ తప్పించుకోలేని స్థితికితెచ్చాడు

అవును
ఈ కవిగాడూ నేనూ కవలలం

అమ్మ గర్భం లోంచి ఒకేసారి పుట్టాం

అక్షరాలమై కలవడానికి ఇన్నేళ్ళు పట్టింది

నేరం నాదా…కవి దా….

చోద్యం ! శిక్షలు ఎంతో సరలమై
నేరస్థుడి దోషాలు మాఘవేసినట్లే ఉంటాయి
ముఖం పై ఏ మాత్రం భయం సెగ ఉండదు
రిమాండులు కోర్టులు చెరసాలలూ
కీచకులకు సేదగా ఒయసిస్సులేనేమో
శిక్షా కాలంలోనూ గుడ్లు మాంసం తింటూ
అత్తవారిల్లు వైభవంగా గోవా ఊటిలాగే జైల్లా !!

శిక్షలు ఎంత సుఖమో !
శిక్షా స్మృతులు రాసేవారికి
ఆడ పడుచులున్నారా ??
శోధనగా మా ఆవేదనా ప్రకరణము

అల్లా ! మీ దేశాలలోని శిక్షలే శిక్షలు
అమ్మాయిల పై చేయి వేయడానికి
మరణ భయంతో వెనుకంజ వేసి
అక్కడికక్కడే పక్షవాతం వచ్చి పడిపోతారు
ఖబరస్తాన్ వాడి అడ్రస్

అసలు న్యాయంగా
వీధి వీధికి ఉరితాడు వేలాడుతూ
మదన కామరాజులకు అనగొండ దృశ్యం కావాలి
తల్లులు తమ  కొడుకు పెరుగుతుంటే
గల్లీలోని ఉరితాడును
చూపుడు వేలితో ముక్కు సూటిగా చూపించి
గుణ పాఠాలు చెప్పాలి  మరి మరీ
వాడికి భవిష్యత్తు దర్శనంగా !!

పగలైతేనేం అర్ధరాత్రి ఐతేనేం
సిక్కు వీరుల్లా మా అమ్మాయిలు
ఎక్కడైనా ఖడ్గాలు ధరించిన
వైనమే వైభవమే కావాలి మరి
స్వీయ చరిత్రకు స్వీయ రక్షణ

తల్లులూ ! వంటింట్లో రుచికరంగా
పరాటాలు చేయడమే కాదు
చేతి వాటంగా కరాటే చేయాల్సిందే
దెబ్బకు సీసా మత్తు దిగి
శాశ్వతంగా మగ పుట్వడిని మరువాల్సిందే

ఇక అమ్మాయి అంటే ఆయుధ పాణిగా
మనకెంతో నిర్భయం నిమ్మలం

వేలు పట్టుకుని నీతో నేను నడవాలని
నీ గొప్పతనం తెలిసినప్పటి నుంచీ కోరిక
అదేమిటో అసహనమో
ఆధిపత్యమో
ఇలా విదిలించుకుని అలా
గోడకు వేలాడే క్యాలెండర్
చెట్టువై
ఒడిసిపట్టుకుందామనుకున్న
రోజుల ఆకుల్ని విదిలిస్తూ వదిలేస్తూ
నవ్వుతూ
ఏమీ తెలియనట్టుగా వెళ్ళిపోతావు..

నేననుకుంటాను..
నీతో నేను ఆగకుండా నడిచి
జయించిన విజయాలేవో గతం సంచిలో
అపురూపంగా దాచుకుని
మురుద్దామనీ..

చేయి ఎప్పుడు వదుల్తావో తెలీదు
ఓ బద్దక నేస్తం నాతో ముచ్చటించినప్పుడో
ఓ నిర్లక్ష్యం నన్ను నీడలా వెంటాడి లోబరుచుకున్నప్పుడో…

కనీసం ఓ హెచ్చరిక అలారమైనా మోగించకుండా
నన్ను మోసగించి వెళుతూ ఉంటావని ఉక్రోషంతో..

అంతరంగం ముందు నిన్ను నిలదీయిస్తే
ప్రభాత కిరణాల సాక్షిగా
నిశీధి వెలిగే చుక్కల ముందు
చిత్రంగా నన్నే దోషిని చేస్తావు…

నాకంటూ ఓ రోజు రాకపోతుందా
ఏకాగ్రతతో నిన్నే ధ్యానిస్తే
ఏమరుపాటుగా నైనా నిన్ను వదలకుండా ఉంటే…

ఏదో ఒకటి సాధించి
రాలిపోయే రోజుపై చెరగని సంతకమొకటి చేయకపోతానా
నీవిచ్చిన ఈ తరపు కానుకనై మిగలక పోతానా..
కాలమా!…అప్పుడు నువ్వే
నా జయంతినో వర్ధంతినో
కొందరికైనా గుర్తొచ్చేలా చేస్తావు..
నీపై నాకా నమ్మకం ఉంది

బ్రతుకుటెట్లనుచును* భయపడుటేలకో? పక్షిగూడునువీడి* బయలు దేరి! గింజలు వెతుకుచు* గెంతుచు పోవును! వానిజాడనెరుగు* వరకు వేగ! జీవన మందును* చేయూత కోరతు! యత్నమ్ము చేయుము* యాతననక! ఊరపిచ్చుకతీరు* ఉబలాటపడుచుండ! అన్నపానాదులు* నందగలరు! జీవసత్యమ్ముపిచ్చుక* జీవితమ్ము! యత్నమును జేయ తెలియునా* హారపథము! సాధనమ్మున సమకూరు* సత్ఫలితము! జీవితమ్మననిదియెగా* చివరివరకు!

ఈ దేహం ఒక వ్యవస్థ అనుక్షణం దానితో అవస్థ

‘ఇక్కడికి రా నాన్నా’ కొడుకు పిలుపు

స్నానాల గదికి పోలేనివాడు సముద్రాలు దాటగలడా?

పక్కింటి పిల్లలే నీ బర్త్ డే చేస్తారు

కొవ్వొత్తి ఆర్పి కేక్ లోకి చాకు దించుతుంటే

ఏవేవో భావాలు

క్రమంగా జబ్బు గ్రహణమవుతుంది

‘ఆపరేషన్’ అంటాడు డాక్టర్

నీ గదిలో ఫినాయిల్ వాసన గుప్పుమంటుంది

మేకప్ చేసుకున్న మేకపోతు గాంభీర్యం

నీరు కారిపోతుంది

కళ్ళుమూస్తే పాపం చచ్చిపోయిన వాళ్ళంతా

కలలో క్యూ కడుతున్నారు

ఆపరేషన్ థియేటర్ లోకి అడుగుపెట్టగానే

కోడి రెక్కల టపటపలా గుండె దడ

ప్రాణభయం ఉదాసీనంగా మొదలై ఉధృతమవుతుంది

మణికట్టుమీద శరీరంలోకి రహదారి పరుస్తారు

రక్తం బొట్టు బొట్టుగా దేహంలో కలుస్తుంటే

నీ రక్తాన్ని నువ్వే తాగుతున్న భ్రాంతి

ముక్కుతో పొడిచి షుగర్ ను కొలిచి

వడ్రంగి పిట్టలా ఎగిరిపోతుంది గ్లూకోమీటర్

ఆక్సీజన్ పైపు దేహాన్నో బెలూన్ను చేస్తుంది

మెత్తగా మత్తుసూది దిగుతుంది

కత్తులు కత్తెర్లు కాసేపు సర్జన్ చేతులవుతాయి

‘ఆపరేషన్ సక్సెస్’ అన్న అభినందనతో

రాలబోతున్న పువ్వును

అంటుపెట్టుకుంటుంది ఆశాలత

ఐసియు అజ్ఞాతవాసంలో కూడా

గాయంమీద కుట్టుమిషన్ నడుస్తూనే ఉంటుంది

మగత నిద్రలో ఎవరో పిలిచినట్లనిపిస్తే

మూగరోదన దైవస్మరణ ఫలించి

నీ వాళ్లు వచ్చారని భ్రమపడతావు

వాళ్ళు నీ పక్క పేషంట్ కొడుకు కోడలు

ఆమె చంకలోని పాప ‘తాతా’ అని పిలుస్తూ

ఎత్తుకొమ్మని నీకు చేతులందిస్తుంది

పోయిన ప్రాణం లేచి వస్తుంది

నీ జీవితం లెక్కలో మిగిలిన కాలం రెట్టింపవుతుంది!